BM 022500 (RINAP 3/1 Sennacherib 04, ex. 02) [Sennacherib][via rinap/sources]
| Obverse | |
| 11 | md⸢EN.ZU⸣-ŠEŠ.MEŠ-eri-ba LUGAL GAL-ú LUGAL dan-nu LUGAL kiš-šá-ti LUGAL KUR aš-šur.KI LUGAL la šá-na-an ⸢RE⸣.É.UM mut-nen-nu-ú pa-⸢liḫ DINGIR⸣.MEŠ ⸢GAL⸣.MEŠ |
| 22 | na-ṣir kit-ti ra-ʾi-im mi-šá-ri e-piš ú-sa-a-ti a-lik tap-pu-ut a-ki-i sa-ḫi-ru [x]-⸢qa⸣-a-ti |
| 33 | ⸢eṭ⸣-lu gít-ma-lum zi-ka-ru qar-du a-šá-red kal ma-al-ki rap-pu la-ʾi-iṭ la ma-gi-ri mu-šab-⸢ri-qu⸣ za-ma-ni |
| 44 | daš-šur KUR-ú GAL-ú LUGAL-ut la šá-na-an ú-šat-li-ma-an-ni-ma UGU gi-mir a-šib pa-rak-ki ú-⸢šar-ba-a⸣ GIŠ.TUKUL.MEŠ-ia |
| 55 | i-na maḫ-re-e ger-ri-ia ša mdAMAR.UTU-IBILA-SUM.NA LUGAL KUR.kár-dun-ia-áš a-di ERIM.ḪI.⸢A⸣ ELAM.⸢MA.KI⸣ re-ṣi-šú i-na ta-⸢mir⸣-ti kiš.KI áš-ta-kan BAD₅.BAD₅-šu |
| 66 | i-na MURUB₄ tam-ḫa-ri šu-a-tu e-zib KARAŠ-su e-diš ip-par-šid-ma na-piš-tuš e-ṭí-ir GIŠ.GIGIR.⸢MEŠ ANŠE⸣.KUR.RA.MEŠ ⸢GIŠ.ṣu⸣-um-bi ANŠE.KUNGA.MEŠ ša ina qit-ru-ub ta-ḫa-zi ú-maš-še-ru ik-šu-du ŠU.II-a-a |
| 77 | a-na É.GAL-šu (erasure) ⸢ša⸣ qé-reb KÁ.DINGIR.KI ḫa-diš i-ru-um-ma ap-te-e-ma É ni-ṣir-ti-šú KÙ.GI KÙ.BABBAR ú-nu-⸢ut⸣ KÙ.GI KÙ.⸢BABBAR NA₄ a⸣-qar-tu mim-ma šum-šu NÍG.ŠU NÍG.GA ni-ṣir-ti ka-bit-tu |
| 88 | DAM-su MUNUS.UN.MEŠ É.GAL-šú (erasure) LÚ.TIRUM.MEŠ LÚ.man-za-az pa-ni si-ḫir-ti um-ma-a-ni ma-la ba-šu-ú mut-tab-bi-lu-tú É.GAL-uš ú-še-ṣa-am-ma šal-la-tiš am-nu |
| 99 | i-na e-muq d⸢aš-šur⸣ EN-ia 89 URU.MEŠ-šú dan-nu-ti É BÀD.MEŠ (erasure) ša KUR.kal-di ù 6 ME 20 URU.MEŠ TUR.MEŠ ša li-me-ti-šú-nu al-me KUR-ud áš-lu-la šal-la-su-un |
| 1010 | LÚ.úr-bi LÚ.a-ra-mu LÚ.kal-du ⸢ša⸣ qé-reb UNUG.KI NIBRU.KI kiš.KI URU.ḫur-sag-kalam-⸢ma.KI⸣ GÚ.DU₈.A.⸢KI⸣ ZIMBIR.KI EN DUMU.MEŠ URU EN ḫi-ṭi ú-še-ṣa-am-ma šal-la-tiš am-nu |
| 1111 | mEN-DÙ DUMU LÚ.GAL-DÙ i-na GIŠ.GU.ZA LUGAL-ti-šú ú-⸢še⸣-šib UN.MEŠ KUR URI.KI ú-šad-gil pa-⸢nu-uš⸣-šú ⸢UGU⸣ gi-mir na-ge-e KUR.kal-⸢di⸣ LÚ.šu-ut SAG-ia a-na LÚ.NAM-ti áš-kun-ma ni-ir be-lu-ti-ia e-mid-su-nu-ti |
| 1212 | i-na ta-a-a-ar-ti-ia LÚ.tu-uʾ-mu-na LÚ.ri-ḫi-ḫu LÚ.ia-daq-qu LÚ.⸢ú-bu⸣-du LÚ.gib-re-e LÚ.ma-li-ḫu LÚ.gu-ru-mu LÚ.ú-bu-lum LÚ.da-mu-na |
| 1313 | LÚ.gam-bu-lum LÚ.ḫi-in-da-ru LÚ.ru-ʾu-u-a LÚ.pu-qu-du LÚ.⸢ḫa-am⸣-ra-nu LÚ.ḫa-ga-ra-nu LÚ.na-ba-tu LÚ.li-iʾ-ta-a-ú LÚ.a-ra-mu la kan-šu mit-ḫa-riš ak-šudud |
| 1414 | 2 ME 8 LIM UN.MEŠ TUR GAL NITA u MUNUS ⸢7⸣ LIM 2 ME ANŠE.KUR.RA.MEŠ ANŠE.KUNGA.MEŠ ⸢11 LIM⸣ 73 ANŠE.MEŠ 5 LIM 2 ME 30 ⸢ANŠE.GAM⸣.MAL.MEŠ 80 LIM 1 ME GU₄.MEŠ ⸢8⸣ ME LIM 8 ME US₅.UDU.ḪI.A šal-la-tú ka-bit-tu áš-lu-la a-na qé-reb KUR aš-šur.KI |
| 1515 | a-na me-ti-iq ger-ri-ia ša ⸢md⸣AG-EN-MU.MEŠ LÚ.qí-pi URU.ḫa-ra-ra-te KÙ.GI KÙ.BABBAR GIŠ.mu-suk-kan-ni GAL.MEŠ ANŠE.MEŠ ANŠE.GAM.MAL.MEŠ GU₄.MEŠ ù US₅.UDU.ḪI.A ta-mar-ta-šú ka-bit-tu am-ḫur |
| 1616 | ba-ḫu-la-a-ti URU.ḫi-rim-me LÚ.KÚR ⸢ak⸣-ṣi i-na GIŠ.TUKUL ú-šam-qit-ma e-du ul e-zib pag-ri-šú-un i-na ga-ši-ši a-lul-ma si-ḫiḫir-ti URU ú-šal-me |
| 1717 | na-gu-ú šu-a-tu a-na eš-⸢šu⸣-ti aṣ-bat 1-en GU₄ 10 UDU.NÍTA.MEŠ 10 ANŠE GIŠ.GEŠTIN 20 ANŠE ⸢ZÚ.LUM⸣.MA re-še-te-šú a-na DINGIR.MEŠ-ni KUR aš-šur.KI EN.MEŠ-ia ú-kin dà-ri-šam |
| 1818 | i-na 2-e ger-ri-ia daš-šur be-lí ú-tak-kil-an-ni-ma a-na KUR kaš-ši-i ù KUR LÚ.ia-su-bi-⸢gal⸣-la-a-a ša ul-tu ⸢ul-la⸣ a-na LUGAL.MEŠ-ni AD.MEŠ-ia la kit-nu-šú lu al-lik |
| 1919 | qé-reb ḫur-šá-a-ni zaq-ru-ti A.ŠÀ nam-ra-ṣi i-na ANŠE.KUR.RA ar-kab-ma GIŠ.GIGIR GÌR.II-ia ina ti-ik-ka-ti ú-šá-áš-ši ⸢áš⸣-ru šup-⸢šu-qu⸣ i-na GÌR.II-ia ri-ma-niš at-tag-giš |
| 2020 | URU.É-mki-lam-za-aḫ URU.ḫarar-diš-pi URU.É-mku-bat-ti URU.MEŠ-ni-šú-nu É BÀD.MEŠ-ni dan-nu-ti al-me KUR-ud UN.MEŠ ANŠE.KUR.RA.MEŠ ANŠE.KUNGA.⸢MEŠ⸣ <ANŠE.MEŠ> ⸢GU₄⸣.MEŠ ù US₅.UDU.ḪI.A ul-tu qer-bi-šú-un ú-še-ṣa-am-ma šal-la-tiš am-nu |
| 2121 | ù URU.MEŠ-ni-šú-nu TUR.MEŠ ša ni-ba la i-šu-ú ap-pul aq-qur ú-še-me kar-meš É EDIN kul-ta-ri mu-šá-bi-šú-nu i-na dGIŠ.BAR aq-mu-ma di-⸢tal⸣-liš ú-še-mi |
| 2222 | ú-ter-ma URU.É-mki-lam-za-aḫ šu-a-tu a-na bir-tu-ti aṣ-bat UGU ša u₄-me pa-ni BÀD.MEŠ-šú ú-dan-nin-ma UN.MEŠ KUR.KUR ki-šit-ti ŠU.II-ia ina lìb-bi ú-še-šib |
| 2323 | UN.MEŠ KUR LÚ.kaš-ši-i ù KUR LÚ.ia-su-bi-gal-la-a-a ša la-pa-an GIŠ.TUKUL.MEŠ-ia ip-par-ši-du ul-tu qé-reb KUR-i ú-še-ri-⸢dam⸣-ma ina URU.ḫar-diš-pi URU.É-mku-bat-⸢ti⸣ ú-šar-me |
| 2424 | i-na ŠU.II LÚ.šu-ut SAG-ia LÚ.EN.NAM URU.ar-rap-ḫa am-nu-šú-nu-ti NA₄.NA.RÚ.A ú-še-piš-ma li-i-tú ki-šit-ti ŠU.II ša UGU-šú-un áš-tak-ka-nu ṣe-ru-uš-šú ú-šá-áš-ṭir-ma i-na qé-reb URU ul-ziz |
| 2525 | pa-an ni-ri-ia ú-ter-ma a-na KUR.el-li-pi aṣ-ṣa-bat ḫar-ra-nu el-la-mu-u-a mis-pa-ba-a-ra LUGAL-šú-⸢un⸣ URU.MEŠ-šú dan-nu-ti É ni-ṣir-ti-šú ú-maš-⸢šir⸣-ma a-na ru-qé-e-ti in-na-bit |
| 2626 | gim-ri KUR-šu DAGAL-ti GIM MURU₉ ⸢as⸣-ḫu-up URU.mar-ú-biš-ti URU.ak-ku-ud-du URU.MEŠ É LUGAL-ti-šú a-di ⸢34⸣ URU.MEŠ TUR.MEŠ ša li-me-ti-šú-nu al-me KUR-ud ap-pul aq-qur ina dGIŠ.BAR aq-mu |
| 2727 | UN.MEŠ TUR GAL NITA u MUNUS ANŠE.KUR.RA.⸢MEŠ ANŠE⸣.KUNGA.MEŠ ANŠE.MEŠ ANŠE.GAM.MAL.MEŠ GU₄.MEŠ ù ⸢US₅⸣.UDU.ḪI.A la ma-nam áš-lu-la-am-ma a-di la ba-ši-i ú-šá-lik-šú-ma ú-ṣa-ḫir ma-a-su |
| 2828 | URU.ṣi-ṣi-ir-tú URU.ku-um-⸢ma⸣-aḫ-lum URU.MEŠ dan-nu-ti a-di URU.MEŠ TUR.MEŠ ša li-me-ti-šú-nu KUR.É-mba-ar-ru-u na-gu-u a-na gi-mir-ti-šú ul-tu qé-reb KUR-šú ⸢ab⸣-tuq-ma ⸢UGU⸣ mi-iṣ-ri KUR aš-šur.KI ú-rad-di |
| 2929 | URU.el-en-za-áš a-na URU LUGAL-ti-šú ù dan-na-at <na>-ge-e šu-a-tu aṣ-bat-ma MU-šú maḫ-ra-a ú-nak-kir-ma URU.kar-dEN.ZU-ŠEŠ.MEŠ-eri-ba it-ta-bi ni-bit-su |
| 3030 | UN.MEŠ KUR.KUR ki-šit-ti ŠU.II-ia ina lìb-bi ú-še-šib i-na ŠU.II LÚ.šu-ut SAG.MEŠ-ia LÚ.EN.NAM URU.ḫar-ḫar am-nu-ma ú-rap-piš ma-a-ti |
| 3131 | i-na ta-a-a-ar-ti-ia ša KUR.ma-da-a-a ru-qu-ti ša i-na LUGAL.MEŠ-ni AD.MEŠ-ia ma-am-man la iš-mu-⸢ú⸣ zi-kir KUR-ti-šú-un man-da-ta-šú-nu ka-bit-tu ⸢am⸣-ḫur a-na ni-ir be-lu-ti-ia ú-šak-⸢ni⸣-su-nu-ti |
| 3232 | i-na šal-ši ger-ri-ia a-na KUR.ḫa-⸢at⸣-ti lu al-lik mlu-li-i LUGAL URU.ṣi-du-un-ni pul-ḫi me-lam-me be-lu-ti-ia is-ḫu-pu-šu-ma a-na ⸢ru-uq⸣-qí MURUB₄ tam-tim in-na-bit-ma |
| 3333 | URU.ṣi-du-un-nu GAL-ú URU.ṣi-du-un-nu ṣe-eḫ-ru URU.É-zi-it-ta URU.ṣa-ri-ip-tu URU.ma-ḫal-li-ba URU.ú-šu-ú URU.ak-zi-⸢ba⸣ URU.ak-ku-ú |
| 3434 | URU.MEŠ-šú dan-nu-ti É BÀD.MEŠ-ni a-šar ri-i-ti ù maš-qí-ti É tuk-la-ti-šú ra-šub-bat GIŠ.TUKUL daš-šur EN-ia is-ḫu-pu-šu-nu-ti-ma ik-nu-šú še-pu-[x]-a |
| 3535 | mtu-ba-aʾ-lu i-na GIŠ.GU.ZA LUGAL-ti-šú UGU-⸢šú⸣-un ú-še-šib-ma GUN man-da-at-ti be-lu-ti-ia šat-ti-šam la ba-aṭ-lu ú-kin ṣe-ru-⸢uš⸣-šú |
| 3636 | ša ⸢mmi⸣-nu-ḫi-im-mu URU.sam-si-mu-ru-na-⸢a⸣-a mtu-ba-aʾ-lu URU.ṣi-du-un-na-a-a mab-di-li-iʾ-ti URU.a-ru-da-a-a mú-ru-mil-ki (erasure) URU.gu-ub-la-a-a |
| 3737 | mmi-ti-in-ti URU.as-<du>-da-a-a mbu-du-DINGIR URU.É-am-ma-na-a-a mkam-mu-su-na-ad-bi URU.ma-⸢ʾa⸣-ba-a-a mda-a-ram-mu URU.ú-du-um-ma-a-a |
| 3838 | LUGAL.MEŠ-ni KUR MAR.⸢TU.KI ka⸣-li-šú-nu IGI.SÁ-e šad-lu-ti ta-mar-ta-šú-nu ka-bit-tu a-di 4-šú a-na maḫ-ri-ia iš-šu-nim-ma iš-ši-qu GÌR.II-ia |
| 3939 | ù mṣi-id-qa-a LUGAL URU.is-qa-lu-⸢na⸣ šá ⸢la ik-nu-šú⸣ a-[x] ⸢ni-ri⸣-ia DINGIR.MEŠ É AD-šú šá-a-šu DAM-su DUMU.MEŠ-šú DUMU.MUNUS.MEŠ-šú ŠEŠ.MEŠ-šú NUMUN É AD-šú as-su-ḫa-ma a-na KUR aš-šur.KI ú-⸢raš⸣-šú |
| 4040 | mLUGAL-lu-dà-ri DUMU mru-kib-ti LUGAL-šú-nu maḫ-⸢ru⸣-[x] ⸢UGU UN.MEŠ⸣ [x].⸢is-qa-lu-na áš-kun-ma na-dan GUN⸣ kàd-re-e be-⸢lu-ti⸣-ia e-mid-su-nu-ma i-šá-ṭa ab-[x x]-⸢ni⸣ |
| 4141 | i-na me-ti-iq ger-ri-ia URU.É-da-gan-na URU.ia-⸢pu⸣-u URU.ba-na-a-⸢a-bar-qa URU.a-zu-ru URU.MEŠ⸣ [x x] ⸢ṣi⸣-id-qa-a ša a-na ⸢GÌR⸣.[x]-⸢ia⸣ ár-ḫiš la ik-nu-šú al-me KUR-ud áš-lu-la šal-⸢la⸣-[x]-⸢un⸣ |
| 4242 | LÚ.GÌR.NÍTA.MEŠ LÚ.NUN.MEŠ u UN.MEŠ URU.am-qar-ru-na ša mpa-di-i LUGAL-šú-nu EN a-di-i ù ma-mit ⸢šá⸣ KUR ⸢aš-šur.KI bi⸣-re-tú ⸢AN.BAR⸣ [x]-du-ma a-na mḫa-za-qi-ia ia-ú-da-a-⸢a id⸣-di-nu-šú ⸢nak-riš⸣ |
| 4343 | a-na an-zil-li e-pu-šu ip-làḫ-ma lìb-ba-šú-un LUGAL.MEŠ KUR.mu-ṣu-ri LÚ.ERIM.MEŠ GIŠ.PAN GIŠ.GIGIR.MEŠ ANŠE.KUR.RA.MEŠ ša LUGAL <KUR>.⸢me-luḫ-ḫa⸣ e-mu-qí la ni-bi ⸢ik-te-ru-nim-ma il-li-ku re-ṣu⸣-šú-un |
| 4444 | i-na ta-mir-ti URU.al-ta-qu-ú el-la-mu-u-a si-id-ru šit-ku-nu ú-šá-ʾa-lu GIŠ.TUKUL-šú-un i-na tukul-ti aš-šur ⸢EN⸣-ia it-ti-šú-un am-da-<ḫi>-iṣ-ma áš-ta-kan ⸢BAD₅⸣.BAD₅-šú-un |
| 4545 | LÚ.EN GIŠ.GIGIR.MEŠ DUMU.MEŠ LUGAL.MEŠ KUR.mu-ṣu-ra-a-a (erasure) a-di LÚ.EN GIŠ.GIGIR.MEŠ ša LUGAL KUR.me-luḫ-ḫa bal-ṭu-su-un i-na MURUB₄ tam-ḫa-ri ik-šu-du ŠU.II-a-a |
| 4646 | URU.al-ta-qu-ú URU.ta-am-na-a al-me KUR-ud áš-lu-la šal-la-su-un a-na URU.am-qar-ru-na aq-rib-ma LÚ.GÌR.NÍTA.MEŠ LÚ.NUN.MEŠ ša ḫi-iṭ-ṭu ú-šab-šu-u a-duk-ma ina di-ma-a-ti si-ḫir-ti URU a-lul pag-ri-šú-un |
| 4747 | DUMU.MEŠ URU e-piš an-ni ù gíl-la-ti a-na šal-la-ti am-nu si-it-tu-te-šú-nu la ba-bil ḫi-ṭi-ti ù gul-lul-ti ša a-⸢ra⸣-an-šú-nu la ib-šu-ú uš-šur-šu-nu aq-bi |
| 4848 | mpa-di-i LUGAL-šú-nu ul-tu qé-reb URU.ur-sa-li-im-mu ú-še-ṣa-am-ma i-na GIŠ.GU.ZA be-lu-ti UGU-šú-un ú-še-šib-ma man-⸢da⸣-at-tú be-lu-ti-ia ú-kin ṣe-ru-uš-šú |
| 4949 | ša mḫa-za-qi-ia-ú URU.ia-ú-⸢da-a⸣-a 56 URU.MEŠ-šú É BÀD.MEŠ dan-nu-ti-šú ù URU.MEŠ TUR.MEŠ šá li-me-ti-šú-nu šá ni-ba la i-šu-ú |
| 5050 | i-na šuk-bu-us a-ram-me ù qur-⸢ru⸣-ub su-pe-e mit-ḫu-uṣ zu-uk GÌR.II pil-ši nik-si ù kal-ba-na-te al-me ak-šudud |
| 5151 | 2 ME LIM 1 ME 50 UN.MEŠ TUR GAL NITA ⸢u⸣ MUNUS ANŠE.KUR.RA.MEŠ ANŠE.KUNGA.MEŠ ANŠE.MEŠ ANŠE.GAM.MAL.MEŠ GU₄.MEŠ ù US₅.UDU.ḪI.A šá la ni-bi ul-tu qer-bi-šú-un ú-še-ṣa-am-ma šal-la-tiš am-nu |
| 5252 | šá-a-šú GIM MUŠEN qu-pi qé-reb URU.ur-sa-li-im-ma URU LUGAL-ti-šú e-sír-šu URU.ḪAL.ṢU.MEŠ UGU-šú ú-rak-kis-ma a-⸢ṣe⸣-e KÁ.GAL URU-šú ú-ter-ra ik-ki-bu-uš |
| 5353 | URU.MEŠ-šú ša áš-lu-la ul-tu qé-reb KUR-šú ⸢ab⸣-tuq-ma a-na mmi-ti-in-ti LUGAL URU.as-du-di ù mpa-di-i LUGAL URU.⸢am⸣-qar-ru-na mGISSU-EN LUGAL KUR.ḫa-zi-te ad-din ú-ṣa-ḫi-ir KUR-su |
| 5454 | e-li GUN maḫ-ri-ti na-⸢dan šat-<ti⸣>-šú-un man-da-at-ti kàd-re-e be-lu-ti-ia ú-rad-di-ma ú-kin ṣe-ru-uš-šú |
| 5555 | šu-ú mḫa-za-qi-ia-ú pul-ḫi me-lam-me be-lu-ti-ia is-ḫu-pu-šu-ma LÚ.úr-bi LÚ.ERIM.MEŠ SIG₅.MEŠ ša a-na dun-nu-un URU.ur-sa-li-im-mu-ú URU LUGAL-ti-šú ú-še-ri-bu ir-šu-ú til-la-a-te |
| 5656 | 30 GUN KÙ.GI 8 ME GUN KÙ.BABBAR ni-siq-ti gu-uḫ-li ták-kàs-si AN.ZA.GUL.ME GAL.MEŠ GIŠ.NÁ.MEŠ ZÚ GIŠ.GU.ZA.MEŠ né-me-di ZÚ KUŠ AM.SI ZÚ AM.SI GIŠ.ESI GIŠ.TÚG lu-bul-ti bir-me TÚG.GADA SÍG.ta-kil-tú SÍG.ar-ga-man-nu |
| 5757 | ú-nu-ut ZABAR AN.BAR URUDU AN.NA AN.BAR GIŠ.GIGIR.MEŠ ga-ba-bi as-sa-ma-re-e si-ri-ia-am GÍR.MEŠ AN.BAR šib-bi til-pa-ni uṣ-ṣi til-li ú-nu-ut ta-ḫa-zi šá ni-ba la i-šu-ú |
| 5858 | it-ti DUMU.MUNUS.MEŠ-šú MUNUS.UN.MEŠ É.GAL-šú LÚ.NAR.MEŠ MUNUS.NAR.MEŠ ⸢i⸣-na qé-reb NINA.KI URU be-lu-ti-ia EGIR-ia ú-še-bi-lam-ma a-na na-dan man-da-at-ti ù e-peš ARAD-ú-ti iš-pu-ra rak-bu-šú |
| 5959 | i-na šal-la-at KUR.MEŠ šá-ti-na ša áš-lu-la 10 LIM GIŠ.PAN 10 LIM GIŠ.a-ri-tú ina lìb-bi-šú-nu ak-ṣur-ma UGU ki-ṣir LUGAL-ti-ia ú-rad-di |
| 6060 | si-it-ti šal-la-ti na-⸢ki⸣-ri ka-bit-tu a-na gi-mir KARAŠ-ia ù LÚ.EN.NAM-ia UN.MEŠ ma-ḫa-ze-ni-ia GAL.MEŠ ki-ma ṣe-e-ni lu ú-za-ʾi-iz |
| 6161 | i-na u₄-me-šu-ma NINA.KI ma-ḫa-zi ṣi-i-ru <URU> na-ram diš-tar ša nap-ḫar ki-du-de-e DINGIR.MEŠ u dIŠ.TAR.MEŠ ba-šu-ú qé-reb-šu |
| 6262 | tem-me-en-nu da-ru-ú du-ru-uš ṣa-a-ti ⸢ša ul⸣-tu ul-la it-ti ši-ṭir bu-ru-ú-me eṣ-rat-su eṣ-ret-ma šu-pu-ú ṣi-in-du-šú |
| 6363 | áš-ru nak-lu šu-bat pi-riš-ti ša mim-ma šum-šu ši-[x] ⸢ni⸣-kil-ti gi-mir pel-lu-de-e ni-ṣir-ti làl-gar šu-ta-⸢bu⸣-lu qé-reb-⸢šú⸣ |
| 6464 | ša ul-tu ul-la LUGAL.MEŠ-ni a-li-kut maḫ-ri AD.<MEŠ>-ia ul-la-nu-u-a be-lu-ti KUR aš-šur.KI e-pu-šu-ma ú-ma-ʾe-er-ru ba-ʾu-lat dEN.LÍL |
| 6565 | ù šat-tú-šam la na-par-ka-a e-reb nar-ba-a-ti GUN mal-ki kib-rat ar-ba-ʾi im-da-na-ḫa-ru qé-reb-šu |
| 6666 | a-a-um-ma ina lìb-bi-šú-nu a-na É.GAL qer-bi-šu kúm-mu ri-mit be-lu-ti ša ṣu-uḫ-ḫu-ru šu-bat-su le-e-su ul id-da-a lib-bu-uš ul iḫ-su-us |
| 6767 | a-na šu-te-šur SILA URU ù šum-dul₆ re-ba-a-ti ḫa-re-e ÍD za-qa-⸢ap⸣ ṣip-pa-a-ti uz-zu-un-šú ul ib-ši-ma ul uš-ta-bil ka-ras-su |
| 6868 | ia-a-ti mdEN.ZU-PAP.MEŠ-eri-ba LUGAL KUR aš-šur.KI e-peš šip-ri šu-⸢a-tu⸣ ki-i ṭè-em ⸢DINGIR.MEŠ a-na⸣ uz-ni-ia ib-ši-ma ka-bat-ti ub-lam-ma |
| 6969 | te-ne-šet KUR.kal-di LÚ.a-ra-me KUR.man-na-a-a KUR.qu-e KUR.ḫi-lak-ku KUR.⸢pi-liš⸣-tu ù ṣur-ri ša a-na ni-ir-ia la ik-nu-šú as-su*-ḫa-am-ma tup-šik-ku ú-šá-áš-ši-šú-nu-ti il-bi-nu SIG₄ |
| 7070 | a-pe ku-pe-e ša qé-reb KUR.kal-di ak-šiṭ-ma ap-pa-ri-šú-un ⸢šam-ḫu-ti i-na ba-ḫu⸣-la-ti na-ki-ri ki-šit-ti ŠU.II-ia ú-šal-di-da a-na e-peš šip-ri-šá |
| 7171 | É.GAL maḫ-ri-tu ša 3 ME 60 ina 1.KÙŠ UŠ tar-ṣi za-me-e É ziq-qur-rat 80 ina 1.KÙŠ DAGAL ⸢i-na⸣ (erasure) É.na-ma-ri É diš-tar 1 ME 84 ina 1.KÙŠ DAGAL i-na tar-ṣi É.na-ma-ri É-kid₉-mu-ri 95 ina 1.KÙŠ DAGAL |
| 7272 | ša LUGAL.MEŠ-ni a-li-kut maḫ-ri AD.MEŠ-ia a-na ri-mit be-lu-ti-šú-un ú-še-pi-šu-ma la ú-nak-ki-lu ši-pir-šá |
| 7373 | ÍD.te-bil-ti a-gu-ú šit-mu-ru ša i-na na-ši-šá ge-gu-né-e qa-bal-ti URU ú-ab-bi-tu-ma ki-maḫ-ḫi-šú-⸢un pa-az-ru-ti ú⸣-kal-li-⸢mu⸣ dUTU-šú |
| 7474 | ù ul-tu u₄-me SÙ.MEŠ ṭe-eḫ É.GAL i-ba-ʾu-ú-ma i-na ILLU-šá gap-ši i-na uš-ši-šá ab-bu ú-šab-šu*-ú ú-ri-bu tem-me-en-šá |
| 7575 | É.GAL.TUR.RA šá-a-tu a-na si-ḫir-ti-šá a-qur-⸢ma⸣ ša ÍD.te-bil-ti ma-lak-šá uš-te-eš-na-a ab-bu uš-ṭib-ma ú-še-šir mu-ṣu-u-šá |
| 7676 | qé-reb ka-tim-ti a-sur-rak-ku-šá šap-la-nu GI.MEŠ e-la-niš NA₄ KUR-i dan-ni it-ti ESIR.UD.A ak-si-ma A.ŠÀ ul-tu ma-a-me ú-še-lam-ma na-ba-liš ú-ter |
| 7777 | 7 ME ina 1.KÙŠ AS₄.LUM GAL-ti UŠ 1 ME 76 ina AS₄.LUM GAL-ti ⸢SAG⸣.KI AN.TA IM.SI.SÁ 2 ME 68 ina AS₄.LUM GAL-ti SAG.KI MURUB₄-ti mé-eḫ-ret za-me-e at-man-ni ku-tal diš-tar |
| 7878 | 3 ME 83 ina AS₄.LUM GAL-ti SAG.KI qab-li-tum šá-ni-tú mu-⸢uḫ⸣-ḫur-ti šá-a-ri a-mur-ri ku-tal É ziq-rat É diš-tar |
| 7979 | 3 ME 86 ina AS₄.LUM GAL-ti SAG.KI KI.TA IM.U₁₈.LU ÚS.⸢SA.DU ÍD.IDIGNA⸣ tam-la-a ú-mal-li-ma am-šu-uḫ me-ši-iḫ-ta |
| 8080 | la-ba-riš u₄-me i-na ILLU kiš-šá-ti tem-me-en-šú ⸢la e⸣-né-⸢še as-kup-pat NA₄.pi-i-li rab-ba-a-ti⸣ ki-su-ú-šu ú-šá-as-ḫi-ra ú-dan-ni-na šu-pu-uk-šá |
| 8181 | MU.SAR-e ši-ṭir šu-mi-ia 1 ME 60 ti-ib-ki tam-li-i qé-reb-šu al-ṭu-ur-⸢ma⸣ [...] e-zib aḫ-ra-taš |
| 8282 | ar-⸢ka-a-nu šu-uš-qu⸣-ú tam-li-i ka-bat-ti ub-lam-ma 20 ti-ib-ki ⸢ṣe⸣-[x] ⸢maḫ-ri⸣-[...] ⸢ti⸣-ib-ki ú-šaq-qí e-la-niš |
| 8383 | tar-pa-šu-ú UGU ⸢ša u₄-me pa-ni⸣ ú-šar-bi ṣe-er me-ši-iḫ-ti ⸢É.GAL maḫ⸣-ri-te ú-rad-di-ma ⸢ú-šá-an-di-la⸣ ši-kit-taš |
| 8484 | É.GAL NA₄.⸢GIŠ.NU₁₁.GAL ZÚ AM.SI GIŠ.ESI GIŠ.TÚG GIŠ.mu-suk-kan-ni⸣ GIŠ.EREN GIŠ.ŠUR.MÌN GIŠ.⸢dáp-ra-nu ŠIM⸣.LI ù GIŠ.bu-uṭ-ni é-gal-zag-di-nu-⸢tuku-a a-na⸣ [...]-⸢ia⸣ ú-še-pi-šá qé-reb-šá |
| 8585 | GIŠ.KIRI₆.MAḪ-ḫu tam-šil KUR.ḫa-ma-nim ša gi-[x] ŠIM.ḪI.A ⸢GURUN ṣip-pa-a⸣-ti GIŠ.MEŠ tuk-lat KUR-i ù KUR.kal-di ⸢qé⸣-reb-šu ⸢ḫur⸣-[...]-šá az-qu-up |
| 8686 | áš-šú za-qa-ap ṣip-pa-a-ti A.ŠÀ ta-mir-⸢ti e-le-en URU 2(BARIG)⸣.TA.ÀM a-na DUMU.MEŠ URU.NINA.KI pil-ku ú-pal-lik-ma [...]-⸢la⸣ pa-nu-uš-šú-un |
| 8787 | a-na miṭ-ra-a-ti šum-mu-ḫi ul-tu ⸢pa⸣-a-ṭi ki-si-ri a-di ta-mir-ti URU.NINA.KI KUR-a ù bi-ru-tú ina ak-kul-la-a-ti ú-šat-⸢tir⸣-[x x]-⸢še⸣-šir ⸢ÍD⸣.ḫar-ru |
| 8888 | 1 1/2 KASKAL.GÍD qaq-qa-ru (erasure) ul-tu qé-reb ÍD.ḫu-su-ur ma-a-me da-ru-ú-ti a-šar-šá ú-šar-da-a qé-reb ṣip-pa-a-ti šá-ti-na ú-šaḫ-bi-[x] ⸢pat⸣-ti-iš |
| 8989 | ša ⸢NINA.KI URU⸣ be-lu-ti-ia šu-bat-su ⸢uš⸣-rab-bi re-ba-ti-šú ú-šá-na-dil-ma bi-re-e-ti ù su-qa-ni uš-par-di-⸢ma⸣ [x x]-⸢mir GIM⸣ u₄-me |
| 9090 | i-na mé-eḫ-ret ⸢KÁ⸣.GAL MURUB₄ URU i-na a-gúr-ri NA₄.pi-i-li pe-ṣe-e a-na me-ti-iq be-lu-ti-⸢ia⸣ ú-[x x]-is ti-tur-ru |
| 9191 | MU.SAR-a ú-še-piš-⸢ma⸣ li-i-tú ù da-na-nu ša i-na tukul-ti aš-šur EN GAL-e EN-ia ⸢UGU kul⸣-[x] ⸢na⸣-ki-ri áš-tak-ka-⸢nu⸣ |
| 9292 | ù mim-ma ep-šet e-tep-pu-šu qé-reb-šú ú-šá-áš-ṭir-ma i-na tem-me-en-nu É.GAL be-⸢lu-ti⸣-ia e-zib aḫ-ra-⸢taš⸣ |
| 9393 | a-na ar-kàt u₄-me i-na LUGAL.MEŠ-ni DUMU.MEŠ-ia ša daš-šur a-na RE.É.UM-ut KUR ù UN.MEŠ i-nam-bu-ú ⸢zi⸣-[x x] ⸢e⸣-nu-ma É.GAL šá-a-tu i-lab-bi-ru-ma en-na-ḫu |
| 9494 | an-ḫu-sa lu-⸢ud⸣-diš MU.SAR-e ši-ṭir šu-mi-ia li-mur Ì.GIŠ lip-šu-uš UDU.SISKUR liq-qí a-na áš-ri-šú ⸢li-ter daš-šur⸣ ik-ri-bi-šu i-šem-me |
| 9595 | 1 UŠ 34.TA.ÀM MU.DIDLI MU.SAR-e ITI.GU₄.SI.SÁ li-mu mmi-tu-nu ⸢LÚ⸣.GAR.KUR URU.i-sa-⸢na⸣ |